Nafarroa familiarekin

NATURA ETA HAURRAK, BIKOTE EZIN HOBEA

IPARRALDEAN, Pirinioek erruz eskaintzen dizute natura. Basoak, hala nola Irati, Bertiz eta Kintoa, non hostoak eta fruituak bil ditzakezuen, errekastoen gainetik salto egin edo isilik geldi zaitezketen adi-adi…; arroilak, non sai ikusgarriak begizta ditzakezuen, hala nola Irunberrikoa eta Arbaiungoa; harriekin txipi-txapa egiteko errekak edo freskaldi bat hartzeko igerileku naturalak; ur jauzi ederrak dituzten iturburuak, pik-nik bat egiteko urtegiak, hala nola Leurtzakoak, eta leize misteriotsuak, hala nola Zugarramurdikoa.

Leku horiek hobeki ezagutzeko, horietarako aproposak diren espazio didaktikoetara joatea da hoberena; erakusketen, panel interaktiboen eta proiekzioen bidez ikasiko dute, ongi pasatzen duten bitartean. Hala, baditugu Natura Interpretatzeko Zentroak, baita museoak ere, esate baterako Sorginen museoa eta Eztigintzaren museoa... Eta ezin ditugu baserri-eskolak ahantzi, non ingurune naturala oso hurbiletik biziko baitute.

Ibiltzea gustukoa badute, plan ederra da bidexka batean barna joatea. Nafarroan, mota guztietakoak aurkituko dituzu, baina, oro har, gehienak oso irisgarriak dira, mendialdean ere bai, Nafarroako Pirinioak ibilerraz samarrak baitira. Ibilbide tematikoak aurkituko dituzu, honako gai hauei buruz: garai bateko lanbideak, bunkerrak, erromatar galtzadak eta gaur egun erabiltzen ez diren burdinbideak, esaterako, Plazaolako eta Bidasoako bide berdeak.

Zuen kontura egin ditzakezue, baina nahiago baduzue bidean gida zaitzatela eta ibilbideari buruzko pasadizoak, bitxikeriak eta kontu aipagarrienak kontatu diezazkizuetela, aukera ona da gidari espezializatuekin joatea. Mota guztietako bisitetarako zerbitzuak ematen dituzte: oinez, bizikletaz, baita zaldiz ere.

Oso aktiboa den jendeak iparraldean dauden aisialdi- eta abentura-parkeetan pasatu behar luke egun bat. Han, paisaia zoragarriak zeharkatzen dituzten tirolina erraldoiak aurkituko dituzue, eta via ferratak, paintballak, zubi tibetarrak, btt-rako zirkuituak...

 

ESENTZIAREKIN KONEKTATZEN ZAITUZTETEN HERRI EDERRAK

Ehunka urteko harrizko etxetzar armarridunak ikusiko dituzte, balkoi jarraitu handiak, oiloak eta untxiak bizileku dituzten baratzeak.., eta, inguruan buelta bat emanez gero, zaldiak, behiak, zerriak eta ardiak ere aurkituko dituzte. Oso gauza naturalak dira, baina, beren egunerokoan ikusten ez dituztenez, izugarri gustatuko zaizkie. Gainera, ogi biribila erosi ahal izango duzue; tabernan, txistorra jan, edo herriko jatetxean, etxeko plater gozo bat dastatu, hori baita bukaerarik hoberena, paseo bat egin ondoren.

GERRARIEN GAZTELUAK, PRINTZESEN JAUREGIAK ETA ERDI AROKO HERRIAK

ERDIALDEAK zereal-soro eta mahasti lasaien paisaia du ezaugarri, eta Donejakue bideak Nafarroan egiten dituen kilometro gehienak hartzen ditu; hala, aprobetxa ezazue azaltzeko zer den bidea, erreparatu erromesen janzkerari, eta haiek hartzen dituzten aterpetxeei, eta erromanikoaren berri izan dezatela Zangozako Santa Marian, Eunaten edo Lizarran. Erdi Aroko iruditeria zenbaitetan hain da burutsua, ezen, ongi azalduz gero, dibertigarria suerta baitakieke. Eta inguru horretan bazabiltzate, eman begiradatxo bat Irantzuko Lurretako agendari: egin ur-jarduerak Allozko urtegian, bisitatu haurrentzako jarduerak eskaintzen dituen gatzaga bat, paseatu mahastien artean gurdi batean...

Inguru horretan, Erriberriko jauregia nahitaez bisitatzeko lekua da, Eurodisney ekartzen baitigu gogora. Han, ederki pasatuko dute hura goitik behera ikusi eta dorreetara igotzen diren bitartean. Ez galdu haurrentzako bisitaldia edo antzeztutakoa, horietan adi-adi egongo baitira, seguru! Eta, handik hurbil, Uxue Erdi Aroko herria dugu; han, ogi apurrez eta garrapiñatuez gain, harrizko kaleez osatutako labirinto bat aurkituko dute, lasterka egiteko eta barrena husteko. Antzeztutako bisitaldi guztiei buruzko informazioa izateko + info

Xabierko gazteluaere aukera bikaina da; hantxe jaio zen Nafarroako patroia San Frantzisko Xabierkoa, XVI. mendean. Eta, handik hurbil, Leireko monasterioa dugu; lortuko al dugu han haurrak erlaxatzea gregoriar kanturen bat adituz?

HEGOALDEAN, FAMILIA AISIALDIRAKO PARKE DIBERTIGARRI BAT ETA INGURUNE NATURAL HARRIGARRIA

Sendaviva parkean, Nafarroako bertako espezieak ezagutuko dituzte, baita animalia exotikoak ere, hala nola lehoiak, hartzak eta tigreak; hogeita hamar bat atrakzioez gozatu ahal izango dute: ur-labirintoa, txalupak, tubinga, bobsleigha, tirolinak, erorketa librea... Baita ikuskizun dibertigarriez ere, esaterako, zirkoa eta hegazti harraparien erakustaldi ikusgarria.

Erregistroa aldatuz, hortik oso hurbil, inguru honetarako ohiz kanpokoa den parke natural bat aurkituko dugu, Errege Bardea, alderdi erdibasamortuarra baita, eta, ilargiaren itxurako haren formazioengatik eta itxurarengatik, film askoren agertokia izan da, azkenetako bat Tronu Jokoa telesailarena. Modu askotan ekin diezaiokezue: zuen autoan edo hango xarmaz gozatzeko jardueraren bat eginez, hala nola lur orotako ibilgailuz, quadez edo buggyz, eta zaldiz, eta, horietan, familia esperientzia polita ekar dezaketen uneak bizituko dituzue.

Eta, bukatzeko, ezin zarete handik joan Erriberako hiriburua, Tutera, bisitatu gabe, bai zuen kabuz, bai dibertigarriagoa izatea lor dezaketen gidari adituen eskutik… Eta, hiria beste modu batean ezagutu nahi baduzue, antzinako fatxada asko apaintzen dituzten arte garaikideko horma-irudiei jarrai diezaiekezue; horiek Avant-Garde nazioarteko jaialdiaren edizioetan zehar sortuz joan dira.

ETA GASTRONOMIARI DAGOKIONEZ...

Damoklesen ezpata horrek erotu egiten gaitu batzuetan oporretan (ez legoke gaizki egun batzuez ahaztuko bagenu), baina, lurralde hauetan, konponbidea izan dezake; izan ere, bertako produktu ona ziurtatua izango duzue.

Herrietan, haurrek normalean ongi onartzen dituzten etxeko menuak aurkituko dituzue; egungo sukaldaritza eskaintzen duten jatetxeetan, haurrentzako menuak izaten dituzte haien gustukoak izaten diren gauzekin; eta, besterik ez bada, pintxoetara jo dezakezue: txistorra, tortilla edo urdaiazpikoa, Nafarroako tabernetan ugari izaten baitira, eta, haurrek ohiko pintxoetako bat jaten duten bitartean, zuek gutizia berritzaileenak dastatuz gozatu ahal izango duzue.

Halaber, une egokia izan daiteke milikeriak alde batera utzi, eta gure barazki ezagunak dasta ditzaten: menestra, orburuak, kardua, borraja... Aprobetxatu beren ahoei aukera berriak emateko!

ETA LO EGITEKO?

Beste edozein lekutan bezala, eskura izango dituzue maila eta prezio guztietako hotelak; ingurune naturaletan kokatutako kanpinak, bungalowak alokatzeko; edozein lekutan moldatzen bazarete, aterpetxeak aurkituko dituzue, edo hemen oso ohikoa den aukera bat: landetxeak. Gelaka edo osorik aloka ditzakezue, eta horietako askok haurrentzat egokia den nekazaritza-turismoko jardueraren bat eskaintzen dute.

Eta sorpresa bat eman nahi badiezue, zer iruditzen zaizue leize etxe batean lo egitea? Edo zuhaitz batean? Edo de luxe etxola batean? Gau berezi batek edo bik asko hobetu ditzakete oporrak...

Familia, espero zaituztegu. Gozatu egonaldiaz!